ကုန်းဘောင်မင်းဆက် ၈ ဆက်မြောက် သာယာဝတီမင်း သည် ၁၁၉၉ ခုနှစ်တွင် နောင်တော် ဘကြီးတော်မင်းတရားကို ထီးနန်းမှချ၍ နန်တက်တော်မူခဲ့သည် ။ သာယာဝတီမင်း၏ သားတော်များတွင် အကြီးဆုံးသား ပြည်မင်းသည် အိမ်ရှေ့အရာ ရည်မှန်းထားသော မင်းသားတစ်ပါးဖြစ်၍ လက်ရုံးရည်ထူးချွန်သည့်မင်းသားဖြစ်၏ ။ သာယာဝတီမင်း ကျန်းမာရေးချွတ်ယွင်းပြီး စိတ်ဝေဒနာခံစားနေရချိန်တွင် မိဖုရားခေါင်ကြီး နှင့် ၄င်း၏ သားတော် ပုဂံမင်းတို့၏ ကြံစည်မှုကြောင့် ပြည်မင်း အကျဉ်းချခံရလေ၏ ။ ပုဂံမင်း နန်းတက်သောအခါ ပြည်မင်းနှင့်သားတော်လေးပါး ကွပ်မျက်ခံရလေသည် ။ ပြည်မင်း အိမ်တော်ကိုဝင်ရောက်ဖမ်းစီးစဉ် ၃ နှစ်သားအရွယ် သားအငယ်လေးမှာ နို့ထိမ်းမိခင် ကချီ၍ထွက်ပြေးသဖြင့် အသက်ဘေးမှလွတ်မြောက်ခဲ့၏ ။ ၂ နှစ်အကြာ ထိုမင်းသားလေးကို ပြန်လည်ဖမ်းမိသော်လည်း ပုဂံမင်းက အသက်ချမ်းသာပေးသဖြင့် ၄င်း၏မိခင်ပြည်မင်းမိဖုရား ပြည်ထိပ်ထား ထံပြန်လည်ရောက်ရှိခဲ့လေသည် ။ထိုမင်းသားလေးမှာ ထိပ်တင်တုတ် ဖြစ်လေသည်။ ပုဂံမင်းကို နန်းချ၍ မင်းတုန်းမင်း နန်းတက်လာသောအခါ ပြည်ထိပ်ထားကို အဆောင်တော်ပေး၍ ပြန်လည်စောင့်ရှောက်တော်မူ၏။
တူတော်မောင်ထိပ်တင်တုတ်မှာ အဋ္ဌာရသ ၁၈ ရပ်တွင် ထူးချွန်၍ မင်းတုန်းမင်းက အရေးပေး၏ ။သားတော်မင်းသားများနှင့်မခြား ချစ်ခင်စွာစောင့်ရှောက်၏ ။ ပြာသိုလမြင်းခင်းသဘင်တွင် ဓားရေး လှံရေး မြင်းရေး ပြိုင်ပွဲ၌ ထိပ်တင်တုတ်သည် မိဖုရားခေါင်ကြီး စင်္ကြာဒေဝီ၏ ရွှေကျင်ခတ်ပုဝါ ဆုကို သုံးကြိမ်တိုင်ရသဖြင့် နန်းတွင်းသူများကြားတွင် ရေပန်းစား စန်းပွင့်လှ၏ ။ မင်းတုန်းမင်းကြီးလည်း တူတော်မောင်မင်းသားထိပ်တင်တုတ် ၏ ထူးချွန်မှုကို များစွာအားရသဖြင့် ၁၂၂၂ခုနှစ်တွင် မြင်းတပ် တို့ကို စီမံအုပ်ချုပ်ရသော တပ်မှူး (မြင်းမှူးမင်းသား) အဖြစ် ခန့်ထားတော်မူလေသည် ။ ထိပ်တင်တုတ်၏မိခင် ပြည်ထိပ်ထား မှာ အခြားမဟုတ် ကုန်းဘောင်မင်းဆက်ကိုစတင်တည်ထောင်သူ အလောင်းမင်းတရားကြီးနှင့် သွေးသောက်ရဲဘော် ခြောက်ကျိပ်ရှစ်ယောက်မှ မင်းခေါင်နော်ရထာ ဘွဲ့ခံ ဦးတွန်၏မြေးဖြစ်၏ ။
မင်းသားထိပ်တင်တုတ် သည် ငယ်ရွယ်သော်လည်း ထူးချွန်ထက်မြက်သူဖြစ်၏ ။ မိခင်ပြည်ထိပ်ထား၏ စီမံမှုဖြင့် ရက်ကန်းတော်အုပ်မင်းသားကြီးနှင့် သုံးဆယ်မင်းသမီး တို့၏သမီး ထိပ်တင်ညွန့် နှင့် လက်ဆက်ရန်သဘောတူခဲ့၏ ။ မင်္ဂလာမဆောင်မီ သုံးဆယ်မင်းသမီးကြီး ကွယ်လွန်သဖြင့် ရက်ရွှေ့ဆိုင်းလိုက်ရ၏ ။ ထိုကာလအတွင်း နိုင်ငံခြားသား နန်းတွင်းသူ အာမေးနီးယန်းအပျိုတော် မာရီနာ (မယ်ခင်) နှင့် ရင်းနှီးသည်ကိုအကြောင်းပြု၍ တောင်ပြင်သူဌေးသားနှင့် ခိုက်ရန်ဖြစ်ပွါးခဲ့၏ ။ ဤသို့ဖြစ်သည်ကို သဘောမကျ၍ ရက်ကန်းတော်အုပ်မင်းသားကြီးက သူ့သမီး ထိပ်တင်ညွန့်နှင့်လက်ဆက်ရန်ပြောဆိုထားသည်ကိုပယ်ဖျက်လေသည်။ ထိပ်တင်တုတ်၏အဒေါ်တော်စပ်သူ ရွှေဘိုဝန်ကတော် မင်းသမီး မခင်ပု က ကြားဝင်စေ့စပ်၏ ။ မရသဖြင့် ထိပ်တင်ညွန့် ကိုဆင်နှင့်တင်ကာ ရွှေဘိုသို့ခိုးပြေးလေ၏ ။ ထိုအခါမှ မိဘများက ပြန်လည်ခေါ်ယူလက်ထပ်ပေးကြ၏ ။ သမီးဦးလေးတစ်ဦးဖွားမြင်ခဲ့၏ ။
မင်းသားထိပ်တင်တုတ်၏ဘဝမှာ ငယ်ရွယ်စဉ်ကပင် အသက်ဘေး မှ လွတ်အောင်ရုန်းခဲ့ရ၏ ။ ကံမကုန်၍ မိခင်နှင့်ပြန်ဆုံရပြန်၏။ ထူးချွနိထက်မြက်၍ မင်းတုန်းမင်း၏မြှောက်စားခြင်းခံရ၏။ စန်းပွင့်လွန်းသဖြင့် အချစ်ရေး ရှုပ်ထွေးခဲ့ရ၏ ။ လောကဓံ အတက်အကျ မျိုးစုံကြုံခဲ့ရ၏။ ရဲစွမ်းသတ္တိလည်းရှိ၏ ။ ဤသို့ အလွမ်း အကြမ်း စုံလင်စွာ တွေ့ကြုံဖြတ်သန်းခဲ့ရသော မင်းသားထိပ်တင်တုတ်သည် ( ၁၃၂၀ )ခုနှစ် အသက် ( ၁၀၁) နှစ်အရွယ်တွင် ပေါင်းတည်မြို့၌ ခေါင်းချ အနိစ္စ ရောက်ခဲ့ပေသည် ။ မင်းသားထိပ်တင်တုတ် ပေါင်းတည်သို့ မည်သို့မည်ပုံရောက်ရှိနေထိုင်ခဲ့သည်ကို မှတ်တမ်းရှာမတွေ့ရပါ။
သို့သော် မင်းသားထိပ်တင်တုတ်၏ ဂူဗိမ္မာန် ကတော့ ပေါင်းတည်မြို့ အရှေ့မြောက်ဘက် ကျီကြီးကုန်းဘုရားကြီးသို့သွားရာလမ်း (မဲခေါင်းလမ်း)ဘေးတွင် ယနေ့တိုင်တည်ရှိနေပေသည်။
ထိမ်းသိမ်းပြုပြင်မှုနဲသဖြင့် ပျက်စီးယိုယွင်းလျှက်ရှိနေပါပြီ။
ဂူတွင်တွေ့ရသော စာ နှင့် ဆရာညိုမြ၏ ကုန်းဘောင်ရှာပုံတော် စာအုပ်ပါ သက္ကရာဇ်အချို့ ကွဲလွဲမှုရှိနေပါသည်။ ဂူတွင် မင်းတုန်းမင်းကြီးနှင့် စင်္ကြာဒေဝီ တို့၏ သားတော်ကြီး ဟုရေးထားပါသည် ။ ထိုကဗျည်းစာတိုင်မှာလည်း ပြန်လည်ပြုပြင်ခဲ့ဘူးကြောင်း ကြားသိရပါသည် ။ မည်သူက မည်သည့်နှစ်တွင်ပြုပြင်ကြောင်း ခိုင်လုံသောအထောက်အထားမတွေ့ရပါ ။
မည်သို့ပင်ဆိုစေ သမိုင်းဝင် အမှတ်အသားတစ်ခုဖြစ်သဖြင့် ပေါင်းတည်သားတို့ ထိမ်းသိမ်းစောင့်ရှောက်ခြင်းဖြင့် ဂုဏ်ယူနိုင်ရန် တိုက်တွန်းနှိုးဆော်လိုက်ရပါသည်။
[ ကိုးကား > ကုန်းဘောင်ရှာပုံတော် … (ညိုမြ) , ကဗျည်းစာတိုင် ]
No comments:
Post a Comment