ပေါင်းတည်မြို့ တွင် ထေရဝါဒ ဗုဒ္ဓဘာသာ သံဃာဂိုဏ်း အနေဖြင့်ထင်ရှားရှိသောဂိုဏ်း များမှာ သုဓမ္မာ ဂိုဏ်း နှင့် မဟာဒွါရ ဂိုဏ်းဟူ၍ရှိပါသည်။ သုဓမ္မာ ဂိုဏ်း၏ ဂိုဏ်းကျောင်းမှာ ရွှေကျောင်းကြီးတိုက် ဖြစ်၍ မဟာဒွါရ ဂိုဏ်းကျောင်းမှာ နန်းဦးကျောင်းတိုက်ဖြစ်သည်။ ဤနေရာတွင် "ဂိုဏ်း" ဟုသုံးနှုံးခြင်းအပေါ် အမြင်ရှင်းရန် အနည်းငယ်ဖော်ပြလိုပါသည်။
မြတ်စွာဘုရားရှင်ဟောကြားတော်မူအပ်သော သုတ်၊ ၀ိနည်း၊ အဘိဓမ္မာဟုဆိုအပ်သော ပိဋကတ်သုံးပုံ တွင် သုတ် နှင့် အဘိဓမ္မာ မပါ၊ ၀ိနည်းတော်အပိုင်းတွင်သာ အနက်အဓိပ္ပါယ်ဖွင့်ဆို လိုက်နာမှု၌သာ အနည်းငယ် ကွဲလွဲမှုရှိကာကွဲပြားသွားကြသည့် သံဃာတော်များသည်မိမိတို့၏ ဆရာအစဉ်အဆက်အားဖြင့်ဂိုဏ်းများ အဖြစ်တည်ရှိ ခဲ့ခြင်းဖြစ်ပါသည်။ အယူဝါဒ ကွဲပြားခြင်းမဟုတ်ပါ ။
သာမာန်အားဖြင့် သံဃာအားလုံး သာရေး နာရေး သာသနာရေးများတွင် အတူတကွ ပါဝင်ဆောင်ရွက်ကြသည်သာဖြစ်ပါသည်။ သံဃာ့ တာဝန် ခွဲဝေမှုရှိသည့်အပိုင်းတွင်သာ သက်ဆိုင်ရာဂိုဏ်းကျောင်းအလိုက် စီရင်ဆုံးဖြတ်ကြပါသည် ။ ပေါင်းတည်မြို့ တွင် ဂိုဏ်းအလိုက် တာဝန်ယူဆောင်ရွက်သော ထင်ရှားသည့် ကိစ္စတခုမှာ သီတင်းကျွတ်လပြည့်ကျော်(၁)ရက် ဝါကျွတ်ဆွမ်းသိမ်းပွဲတွင်တွေ့မြင်နိုင်ပါသည်။ မြို့ပေါ်သို့ ဆွမ်းဆန်စိမ်းအလှူခံကြွရာတွင် ဂိုဏ်းအလိုက် ကျောင်းများစာရင်းပြုစု၍ သံဃာများကိုပင့်လျှောက်ကြရပါသည်။ ဆွမ်းခံကြွနေချိန်တွင်လည်း သက်ဆိုင်ရာ ဂိုဏ်းအုပ်ဆရာတော်များက မိမိတို့ဂိုဏ်းအလိုက် ကြွချီသောသံဃာများမှန်ကန်မှုရှိမရှိ လမ်းမှဖြတ်၍ စစ်ဆေးပေးကြရပါသည်။
ဤတွင် စစ်ဆေးကြပ်မတ်ပေးရသော ဂိုဏ်းအုပ်ဆရာတော်များတွင် သုဓမ္မာဂိုဏ်း နှင့် မဟာဒွါရ ဂိုဏ်းအပြင် မင်းကျောင်း ဂိုဏ်း ဟူ၍ ဆရာတော် တစ်ပါး ပါဝင်ပါသည် ။ ဤသို့ဆိုလျှင် မင်းကျောင်းဂိုဏ်း သည် မည်သို့ဖြစ်ပေါ်လာသည်ဆိုခြင်းကိုလေ့လာသောအခါ မင်းကျောင်းဆရာတော်မှ ယခုလိုရှင်းပြခဲ့ပါသည်။
✾ ●•۰ မင်းကျောင်းစတင်ပြီး တည်ထောင်ခဲ့ပုံက နဲနဲဆန်းတယ် …
ပေါင်းတည်မြို့ အရှေ့ဘက် သံသပ်စမ်း ရွာ (သနပ်စမ်း ဟုအသံထွက်ပါသည်)မှ ရှင်ပြုအလှူမင်္ဂလာပွဲတစ်ခုတွင် ရေစက်ချတရားချီးမြှင့်ရန် ထိုစဉ်က သာသနာပိုင်ဆရာတော်၏ တပည့်လက်ထောက်ဖြစ်တော်မူသော ဆရာတော် ဘဒ္ဒန္တ သုန္ဒြ အရှင်သူမြတ်ကို ပင့်ဖိတ်လျှောက်ထားရာ ဆရာတော်လည်း သံသပ်စမ်းရွာသို့ ကြွရောက်ခဲ့ပါသည်။ ကံကြမ္မာ အကြောင်း ဖန်တီးချက် ရက်စက်ပုံက နံနက် ရှင်လောင်းယူတော့မည့်စဲစဲ အကြိုညမှာပင် မောင်ရင်လောင်းများ မတော်တဆ ဆုံးပါးခဲ့ကြရသည်ဟု ဆို၏ ။ ဤသို့ ထိပ်လန့်ကျေကွဲဘွယ်ဖြစ်ရပ်ကြောင့် အလှူရှင်မိသားစုမှာ ရူးမတတ် သောကဗျာပါဒ များလောင်မြိုက်သဖြင့် ကြွရောက်လာသောဆရာတော်ကိုလည်း မပြန်ပါနှင့်အုံးဟု အားကိုးတကြီး တောင်းပန်လျှောက်ထားရာ ဆရာတော်လည်း မပြန်နိုင်ပဲ ဒါယကာများ အားတရားရေအေးဖြင့် ငြိမ်းအေးစေခြင်းငှါ သံသပ်စမ်းမှာပင် ဆက်၍ သီတင်းသုံးနေထိုင်တော်မူခဲ့ပါသည်။ ရက်ကြာလေသောအခါ ပေါင်းတည်မှ တိုက်သူကြီးက ဆရာတော်အား တောရွာတွင် သီတင်းသုံးနေစေခြင်းသည် အလွန် အားနာစရာကောင်းလှပေသည်။ သို့ပါ၍ ပေါင်းတည်မြို့ပေါ်တွင် ကျောင်းဆောက်လှူဒါန်းပြီးသီတင်းသုံးတော်မူနိုင်ရန်စီစဉ်ဆောင်ရွက်ကာ သံသပ်စမ်းရွာမှ လှမ်း၍မြင်နိုင်သောနေရာတွင် မြင်နိုင်လောက်အောင်အမြင့်ရှိ ဘုံပျံပြဿဒ်နှင့်ကျောင်းဆောင်ကြီးဆောက်လုပ်ကာ လှူဒါန်းလေသည်။ ဆရာတော်လည်း တိုက်သူကြီး လှူဒါန်းသောကျောင်းတွင် သီတင်းသုံးကျောင်းထိုင်တော်မူလေ၏ ။ဤသို့ ဆရာတော် ဘဒ္ဒန္တ သုန္ဒြ အရှင်သူမြတ် စတင်ကျောင်းထိုင်ချိန်မှာ မြန်မာသက္ကရာဇ် ၁၂၆၄ ခုနှစ်ဖြစ်သည်ဟု မှတ်တမ်းတွေ့ရပါသည်။ ဆရာတော်သည် မူလကပင် သာသနာပိုင်ဆရာတော်နှင့် အနီးကပ်နေခဲ့ရသော တပည့်လက်ထောက်ဖြစ်ခဲ့သောကြောင့် ထိုအချိန်က ပေါင်းတည်မြို့ တွင်ပေါ်ပေါက်သော သာသနာကိစ္စ ၊ သံဃာကိစ္စ တို့တွင် သက်ဆိုင်ရာ ဂိုဏ်းကျောင်းအသီးသီးကပြေလည်အောင်ရှင်းမရသော သာသနာပိုင်ထံတင်ပြအဆုံးအမ ခံယူရန်လိုအပ်သောကိစ္စ တို့ကို လွယ်ကူ သက်သာစွာဆောင်ရွက်နိုင်ရန် သာသနာပိုင်ဆရာတော်က သူ့ကိုယ်စား စီရင်ဆုံးဖြတ်ခွင့် ကို အမိန့်စာချွန်ထုတ်၍ ပေးအပ်ခဲ့သည် ။ ထိုအခါမှစ၍ မင်းကျောင်း ပထမ ဆရာတော်ကြီး ဘဒ္ဒန္တ သုန္ဒြ မထေရ်သည် သာသနာပိုင်က ခန့်ထားသော ဂိုဏ်းချုပ် အဖြစ် ရောက်ရှိခဲ့ပါသည် ။ ထို့ကြောင့် မင်းကျောင်းသည် ပေါင်းတည်မြို့ တွင် ဒေသဆိုင်ရာ စီရင်ဆုံးဖြတ်ခွင့် ဂိုဏ်းကျောင်းအဖြစ် စတင်ပေါ်ပေါက်ခဲ့သည်ဟု သိရပါသည် ။ တစ်နိုင်ငံလုံး အတိုင်းအတာတွင်မူ မင်းကျောင်းသည် သုဓမ္မာဂိုဏ်းဝင်ဖြစ်ပါသည်။ နောင်အခါ ဆရာတော်ကြီးမရှိတော့သော်လည်း ဆရာတော်၏ တပည့်ရဟန်းများ ကျောင်းထိုင်သည့် ကျောင်းများကို စုရုံး၍ မင်းကျောင်းဂိုဏ်း ဟုသတ်မှတ်ကာ ယနေ့ထက်တိုင် သာသနာ တာဝန်များကို အခြားဂိုဏ်း များနှင့်အတူ ပါဝင်ထမ်းရွက်လျှက်ရှိပါသည်။ ပထမ ဆရာတော်ကြီး ဘဒ္ဒန္တ သုန္ဒြ အရှင်သူမြတ်ကို သာသနာပိုင်မှ တာဝန်ပေးအပ်သော အမိန့်စာချွန်မူရင်းကို ပြန်လည်ကူးယူဖေါ်ပြပေးလိုက်ပါသည်။ မူရင်းပေရွက်ပဲ့ပြတ်နေသောအစွန်းဘက်က စာအနည်းငယ် ပါသွားသည်ကိုတွေ့ရပါသည်။ ပေါ်လွင်သည့်စာများအတိုင်းသာကူးယူဖော်ပြအပ်ပါသည်။ ❂ ပုံသည် ပေရွက်ပေါ်တွင်ခတ်နှိုပ်ထားသော အသားတံဆိပ်ပါရှိကြောင်း သင်္ကေတပြထားခြင်းသာဖြစ်ပါသည်။
(ရှေ့ပထမစာကြောင်း)
ဘုန်းတော်အလွန်ကြီးမြတ်တော်မူလှသော သဗ္ဗညုမြတ်စွာဘုရားသာသနာတော်ကို အသျှင်မဟာကဿပအစရှိသော သင်္ဂါယနာတင် သာသနာပြုမထေရ်မြတ်တို့ကဲ့သို့ မဆုတ်မယုတ်အဓွန့်ရှည်စွာဖြစ်ထွန်း စည်ကား တိုးပွါးရှိအောင် ဆောင်ရွက်ပြုစုတော်မူသော သာသနသောဓကမဟာသံဃရာဇာသာသနာပိုင်ဆရာတော် …
(ရှေ့ဒုတိယစာကြောင်း)
သာသနာမှုများကိုပြုစုဆောင်ရွက်စိမ့်မည့် သာသနာပြုအဖြစ်ဖြင့် လွှဲအပ်ခန့်ထားတော်မူသော သာသနာပြုဆရာတော်တို့ အမိန့်တော်ရှိသည်သာသနာပိုင် ဆရာတော်ဘုရားကြီး လွှဲအပ်တော်မူသည့်အတိုင်း သာသနာမှုများကို ကြည့်ရှုရမည်ဖြစ်သည်နှင့်အညီ ပြည်မြို့ဒိစတြိတ်ပေါင်းတည်မြို့နယ် လေးရပ်ရှစ်ရပ်သတ်မှတ်သည့်အတွင်း သီတင်းသုံးနေထိုင် …
(နောက်ကျော ပထမစာကြောင်း)
သာသနာရေးသာသနာမှုနှင့်စပ်သည်များကို ဝိနည်းဓမ္မကံနှင့်အညီ ဆင့်ဆိုဆုံးဖြတ်စီရင်စိမ့်မည့် ဂဏစရိယ ဂဏပါမောက္ခ ကမ္မာကမ္မဝိနိစ္ဆကအဖြစ် ဖြင့် သက္ကရာဇ် ၁၂၆၉ ခု နတ္တော်လဆုပ် ၁၄ ရက်နေ့ ဂိုဏ်းအုပ် ဂိုဏ်းထောံတို့ဆင့်ဆိုဆုံးဖြတ်စီရင်သည်များကို မပြီးမပြေရှိလျှင် ဆင့်ဆိုဆုံးဖြတ်စီရင်စေရန်ပေါင်းတည်မြို့ မင်းကျောင်း ရှင်သုန္ဒြဂိုဏ်းချုပ်ခန့်အပ်တော်မူသည် ၄င်းဂိုဏ်းချုပ်ကပေါင်းတည်မြို့ဂိုဏ်းဝင် သမဂ္ဂသံဃာတို့ကို ဝိနည်းဓမ္မကံနှင့် …
(နောက်ကျော ဒုတိယစာကြောင်း)
သံဃာတို့လည်း ဂိုဏ်းချုပ်ရှင်သုန္ဒြဝိနည်းဓမ္မကံနှင့်အညီ ဆင့်ဆိုဆုံးမရာနာခံ၍ဂန္ဓာဓူရ ဝိပဿနာဓူရ တရားနှစ်ပါး ကိုပွါးများအားထုပ်ကျင့်ကြံနေထိုင်ကြစေ …
☢ ဤဖော်ပြချက်တွင်ပါရှိသော သံသပ်စမ်းရွာ မှအလှူရှင် ၊ ပေါင်းတည်မြို့ မှတိုက်သူကြီး ၊ ဖြစ်စဉ် တို့ကို ခိုင်လုံသော အထောက်အထား ရှာဖွေနေစဲဖြစ်ပါသည်။ ☢
[ ကိုးကား > ပေရွက် အမိန့်စာချွန်တော် ၊ ယခုလက်ရှိ စတုတ္ထ မြောက်ကျောင်းထိုင်ဆရာတော် ဦးဇောတိက ၏ ပြောပြချက် ။ ]
No comments:
Post a Comment