✺ အထက်တန်းကျောင်းကြီးက လှမ်းကြည့်လိုက်လျှင် ကျောင်းနောက်ဘက် လယ်ကွင်းတွေရဲ့ဟိုးတဖက်မှာ အုတ်တံတိုင်းရှည်ကြီးနှင့် အဝင်မုခ်ဦးမှာ နန်းဆောင် ဘုံပြဿဒ် နှင့် နန်းဦးကျောင်းကို လှမ်းမြင်နေရသည်။ အမည်နှင့်လိုက်အောင် နန်းတော်မြို့ရိုး မြို့တံခါး လို ပုံစံတူ၏။ အပင်ကြီးများ အုပ်အုပ်ဆိုင်းဆိုင်းဖြင့် မြင်ရုံနှင့် အေးချမ်း၏ ။ နန်းဦးကျောင်းလမ်းသည် အထက ကျောင်းနောက်ဘက်ကဖြတ်၍ ရန်ကုန်ပြည် လမ်းမကြီးကို လှေဆိုင်ချောင်းတံတားထိပ်မှာဆုံ၏ ။ ဟိုဘက်ထိပ်ကတော့ ၁၈ လမ်းနှင့် တည့်တည့်အရှေ့လမ်းကိုဆုံ၏ ။ မြို့၏အရှေ့တောင် ဘက်လောက်တွင် နန်းဦးကျောင်းတည်ရှိ၏ ။ ကျောင်းဝင်း ကျယ်ပြီး သစ်ပင်ကြီးများ အုပ်ဆိုင်းနေသည်။ မဟာဒွါရ ဂိုဏ်းဝင်ဖြစ်ပြီး မြို့နယ်၏ ဂိုဏ်းကျောင်းဖြစ်၏။ ကျောင်းဝင်းထဲမှာ ကတ္တီပါသီးပင် ၊ သကြားသီးပင် ၊ တမာပင် ၊ သရက်ပင် ၊ စသည်ဖြင့် အပင်ကြီးမျိုးတွေစုံလှသဖြင့် ဥယျာဉ်ကြီးသဖွယ် ဖြစ်နေသည်။ အများသုံး ရေတွင်းကြီး ၂ တွင်းမှာ မြို့သူမြို့သားတို့ အားထား ခဲ့ရသည့်ရေအလွန်အောင်ပြီး ရေချိုထွက်သည့် ရေတွင်းကြီးများဖြစ်၏ ။ရေတွင်းကြီးအနီးတွင် တမာချိုပင်ကြီးလည်းရှိ၏။ကျောင်း၏ အနောက်ဘက်တွင် ရေကန်ကြီးတစ်ကန်ရှိ၏ ။ ကျောင်းဝင်းထဲတွင် စေတီ ၊ တံခွန်တိုင် ၊ ခေါင်းလောင်း တို့လည်းရှိ၏ ။
ကျောင်းတိုက်ကိုစတင်တည်ထောင်ခဲ့သော ဆရာတော်ကြီးဦးသာဂရမှာထိုခေတ်က ထင်ရှားသော စာပေကျမ်းဂန်တတ် မင်းဆရာ ဘုန်းတော်ကြီးတစ်ပါးဖြစ်လေသည်။
ဆရာတော်လောင်းလျာကို ပေါင်းတည်မြို့ နွယ်ချို ၂ ရပ်ကွက် အဖ ဦးရွှေအုပ် ၊ အမိ ဒေါ်မင်းနော် တို့မှ ၁၂၁ဝ-ခုနှစ် ပြာသိုလပြည့်ကျော် ၁၁ ရက် သောကြာနေ့တွင် ဖွားမြင်တော်မူ၍ မောင်းထောင်ကျောင်းဆရာတော်ကြီးဦးဇိန ထံတွင် ကျောင်းအပ်ပညာသင်ကြားခဲ့သည်။ ထို့နောက် ကျောင်းအမကြီးဒေါ်ဆိုင်းက ရှင်သာမဏေအဖြစ် သွပ်သွင်းချီးမြှောက်ပြီး သံသပ်စမ်းရွာမှ ဦးစိမ်း+ဒေါ်ဌေး တို့က မိဘများထံခွင့်တောင်း၍ မောင်းထောင်ကျောင်းဆရာတော်ကြီး ဦးဇိန ကို ဥပဇ္ဈာယ်ပြုပြီး မြင့်မြတ်သောရဟန်းအဖြစ်သို့ ချီးမြှောက်ခဲ့ပါသည်။ ရဟန်း ၂ ဝါတွင် မန္တလေးမြို့ ဒက္ခိဏာရာမ ဘုရားကြီးတိုက် ဆရာတော်ဦးဇာဂရ ထံတွင်ပညာဆက်လက်သင်ကြားခဲ့သည်။ စာပေထူးချွန်သဖြင့် စာချ ဆရာတော် တစ်ပါးဖြစ်လာခဲ့သည် ။ထိုအချိန်တွင် သီပေါဘုရင် ကိုးကွယ်သော နန်းဦးဆရာတော် ပျံလွန်တော်မူ၍ ဒက္ခိဏာရာမ ဆရာတော်ထံ ကိုးကွယ်ရန် ဆရာတော်တစ်ပါးလျှောက်ထားရာ စာချဆရာတော် ငါးပါးအနက် ဆရာတော်ဦးသာဂရ ကို နန်းဦးကျောင်း၌ သီတင်းသုံးရန် ရွေးချယ်ပင့်လျှောက်သဖြင့် သီပေါဘုရင်၏ နန်းဦးဆရာတော်အဖြစ်ရောက်ရှိခဲ့ပါသည်။ ထိုစဉ်က သီပေါဘုရင်က ဆရာတော်ဦးသာဂရကို သိရီပဝရ မဟာဓမ္မရာဇာဓိရာဇာဂုရု ဘွဲ့ ဆက်ကပ်ခဲ့ပါသည်။ ၁၂၄၇-ခုနှစ်တွင် သီပေါဘုရင်ပါတော်မူပြီးနောက် ဆရာတော်သည် အောက်ပြည်အောက်ရွာ သို့ပြောင်းရွှေ့ကာ မော်လမြိုင်မြို့တွင် ၁ ဝါခန့်သီတင်းသုံးခဲ့ပါသည်။ ထို့နောက် ကျန်းမာရေး ချို့ယွင်းသဖြင့် ဆွေမျိုးညာတကာတို့၏လျှောက်ထား တောင်းပန်မှုကြောင့် ပေါင်းတည်မြို့သို့ပြန်လည် ကြွရောက်ကာ (၁၂၄၈-ခုနှစ်)တွင် နန်းဦးကျောင်းတိုက်ကို စတင်တည်ထောင်ခဲ့ ပါသည်။ ဒေါက်တာဘမော် အစိုးရလက်ထက်တွင် နိုင်ငံတော်သြဝါဒစရိယ လက်မှတ် ဆက်ကပ်ခြင်း ခံခဲ့ရပါသည်။ ဆရာတော်သည် သက်တော် ၅ဝ အထိ ပရိယတ္တိသာသနာပြုလုပ်ငန်းများကို ဆောင်ရွက်တော်မူ၍ ထိုမှနောက်တွင် စာသင်တိုက် စီမံအုပ်ချုပ်မှုတာဝန်များကို တပည့် ဦးဥက္ကံသ နှင့် ဦးပညာသီရိတို့အားလွှဲအပ်ကာ မိမိအတွက် ဝိပဿနာဓူရ ပဋိပတ္တိ အလုပ်ကိုအားထုတ်လျှက် သက္ကရာဇ် ၁၃ဝ၆-ခုနှစ် ကဆုန်လဆန်း ၁ဝ ရက် အင်္ဂါနေ့ သက်တော်(၉၆)နှစ် ဝါတော် (၇၆)ဝါ တွင် ဘဝနတ်ထံပျံလွန်တော်မူခဲ့ပါသည်။
ပထမဆရာတော်ပျံလွန်တော်မူပြီးနောက် ဒုတိယမြောက် နန်းဦးကျောင်းဆရာတော် ဦးဉေယျဓမ္မ ကဆက်လက်ကျောင်းထိုင်ခဲ့ပါသည်။ ဆရာတော်ကြီးသည် ဧရာဝတီတိုင်း ၊ ဟင်္သာတခရိုင် ၊ အင်္ဂပူမြို့ ၊ ခြောက်ရွာ ဇာတိဖြစ်သည်။ အဖ ဦးပန်းဖူး + အမိ ဒေါ်မြစ်တို့မှ ၁၂၅၉-ခုနှစ် ပြာသိုလပြည့်ကျော် ၁၂ ရက် အင်္ဂါနေ့တွင်ဖွားမြင်ခဲ့ပါသည်။ အသက် ၁၂ နှစ်တွင် ရှင်သာမဏေဖြစ်၍ အသက် ၂ဝ ပြည့် ၁၂၇၉-ခုနှစ်ပြာသိုလပြည့်ကျော် ၁၂ ရက် နံနက် ၉ နာရီတွင် ဟင်္သာတမြို့ ဘုရားကြီးတိုက် ခဏ္ဍသိမ်၌ အဂ္ဂမဟာပဏ္ဍိတ ၊ အဘိဓဇမဟာရဋ္ဌဂုရု ဘုရားကြီးဆရာတော် ဘဒ္ဒန္တ ရိဒ္ဒ မထေရ်မြတ်ကို ဥပဇ္ဈာယ်ပြု၍ မြင့်မြတ်သောရဟန်းအဖြစ်သို့ ရောက်ရှိခဲ့ပါသည်။ နန်းဦးကျောင်းပထမ ဆရာတော် ဦးသာဂရ ထံတွင် ပညာသင်ယူခဲ့ဘူးသည့်တပည့် ဖြစ်ခဲ့ဘူး၍ ပထမဆရာတော်လွန်ပြီးနောက် နန်းဦးကျောင်း ဒုတိယ ဆရာတော်ဖြစ်လာခဲ့ပါသည်။ ၁၃၅၁-ခုနှစ် တပေါင်းလပြည့်နေ့တွင် နိုင်ငံတော်ငြိမ်ဝပ်ပိပြားမှုတည်ဆောက်ရေး အစိုးရမှ အဂ္ဂမဟာပဏ္ဍိတဘွဲ့ကို ဆက်ကပ်ခဲ့ပါသည်။ ၁၃၅၇-ခုနှစ် တပို့တွဲလဆန်း ၆ ရက်နေ့ သက်တော်(၉၉)နှစ် ဝါတော် (၇၉)ဝါတွင် ဘဝနတ်ထံပျံလွန်တော်မူခဲ့ပါသည်။
ထို့နောက် နန်းဦးကျောင်း တတိယ ဆရာတော်အဖြစ် ဦးယုဂန္ဓရ မထေရ်မြတ်က ဆက်လက်ကျောင်းထိုင်ခဲ့ပါသည်။ ဆရာတော်သည် ပေါင်းတည်မြို့ ၊ မြို့ကြီးရွာ ဇာတိဖြစ်ပြီး အဖ ဦး ပုဝိုင်း+အမိ ဒေါ်ပေါ တို့မှ ၁၂၇၄-ခုနှစ် တန်ခူးလပြည့်ကျော် ၅ ရက် ဗုဒ္ဓဟူးနေ့တွင် ဖွားမြင်တော်မူခဲ့ပါသည်။ ဘုရားငါးဆူရွာ ကန်ဦးကျောင်း ဆရာတော်ဦးဥက္ကံသထံတွင် ရှင်သာမဏေဖြစ်ခဲ့ပြီး ၁၂၉၄-ခုနှစ် နယုန်လဆုတ် ၃ ရက် နံနက် ၉ နာရီအချိန် ပင်ကတောကျောင်းဆရာတော် ဘဒ္ဒန္တ ကဝိန္ဒ ကို ဥပဇ္ဈာယ်ပြု၍ ပင်ကတောကျောင်း ခဏ္ဍသိမ်၌ မြင့်မြတ်သောရဟန်းအဖြစ်ရောက်ရှိခဲ့ပါသည်။ မြို့ကြီးရွာမှ ဦးထွန်းခင်+ဒေါ်ဖွားခင်တို့က ပစ္စယာနုဂ္ဂဟ ရဟန်းဒါယကာအဖြစ် ကုသိုလ်ပြုခဲ့ပါသည်။ ပေါင်းတည်မြို့ နန်းဦးကျောင်းတိုက်တွင် သက်တော် ၃၄ နှစ် ရဟန်း ၁၄ ဝါ မှစ၍ တိုက်အုပ်စာချဆရာတော်အဖြစ် ပထမငယ် ၊ ပထမလတ် ၊ ပထမကြီး စာဝါများကိုပို့ချခဲ့သည်။ ဆရာတော်သည် ဝိနည်းအရာ၌ အလွန်အလေးထား စောင့်ထိမ်းကြောင်းသိရပါသည်။ ၁၃၇ဝ-ခုနှစ် တပို့တွဲလပြည့်ကျော် ၃ ရက် သက်တော် (၉၇) နှစ် သိက္ခာတော်(၇၈)ဝါတွင် ဘဝနတ်ထံပျံလွန်တော်မူခဲ့ပါသည်။
ထို့နောက် နန်းဦးကျောင်း စတုတ္ထ ဆရာတော် အဖြစ် ဦးမာဃိန္ဒ မထေရ်က ဆက်လက်ကျောင်းထိုင် ခဲ့ရာ ယနေ့ ၁၃၇၇-ခုနှစ်အထိကျောင်းတိုက်ကို စီမံအုပ်ချုပ်လျှက်ရှိပါသည်။ ဆရာတော်သည် ပေါင်းတည်မြို့ ၊ ခေမံရွာ ဇာတိဖြစ်၍ အဖ ဦးကျော်စိန် + အမိ ဒေါ်လှခင်တို့မှ ၁၂၉၇-ခုနှစ် ဝါဆိုလဆန်း(၁၁)ရက် ကြာသပတေးနေ့တွင် ဖွားမြင်တော်မူခဲ့ပါသည်။ (၁၃၁၈-ခုနှစ်) ဝါဆိုလဆန်း (၄) ရက် ဗုဒ္ဓဟူးနေ့တွင် ပင်ကတော ကျောင်းဆရာတော် ဦးကဝိန္ဒကို ဥပဇ္ဈာယ်ပြု၍ ပေါင်းတည်မြို့ တာပွန်လမ်း ရဟန်းအမ ဒေါ်ညိမ်းမယ် နှင့် မိဘ နှစ်ပါး၏ ပစ္စယာနုဂ္ဂဟ ကိုခံယူကာ နန်းဦးကျောင်းတိုက် ခဏ္ဍသိမ်၌ မြင့်မြတ်သောရဟန်းအဖြစ်ရောက်ရှိခဲ့ပါသည်။ ဆရာတော်သည် ပါဠိပဌမပြန်စာမေးပွဲ ပထမငယ်၊ပထမလတ်၊ပထမကြီး၊စာချတန်းတို့ကို အောင်မြင်တော်မူခဲ့ပါသည်။ ညောင်တုန်းမြို့ မြန်မာနိုင်ငံလုံးဆိုင်ရာ သုဓမ္မာပရိယတ္တိ ပဌမပြန်စာမေးပွဲ အလတ်တန်း အကြီးတန်းတို့ကို လည်း ပထမဂုဏ်ထူးဖြင့်အောင်မြင်ခဲ့ပါသည်။ နန်းဦးမဟာဒွါရဝိနယာဓိက စာမေးပွဲ၌ ရှင်ကျင့်ဝတ်ဘိက္ခုပါတိမောက် ဘိက္ခုနီပါတိမောက် မူလသိက္ခာတန်းတို့ကို အသီးသီး ပထမ၊ဒုတိယ၊ပထမ၊ပထမ ဂုဏ်ထူးဖြင့် အောင်မြင်တော်မူခဲ့ပါသည်။ ယနေ့ထိ စာသင်တိုက် စာသင်သံဃာများကို စာဝါများပို့ချပေးလျှက် သာသနာတာဝန်များကိုထမ်းရွက်လျှက်ရှိပါသည်။
ပေါင်းတည်မြို့ နန်းဦးကျောင်းတိုက်သည် ခေတ်အဆက်ဆက် သာသနာပြုဆရာတော်ကြီးများ စီမံအုပ်ချုပ် စောင့်ရှောက်ခဲ့သဖြင့် ယနေ့တိုင် ပရိယတ္တိစာသင်တိုက်အဖြစ်ဆက်လက်တည်ရှိနေပါကြောင်း မှတ်တမ်းပြုစု ဖော်ပြလိုက်ရပါသည်။
۞ ဗုဒ္ဓသာသနံ စိရံ တိဋ္ဌတု ۞
No comments:
Post a Comment