မြန်မာသက္ကရာဇ် ၁၃၁၇ ခုနှစ်က စာဆိုတော်ပွဲဘိတ်ကြားစာ
ယခုမြို့မ အ.ထ.က ကျောင်း
~~~~~~~~~~~~~~~~~~~~~~~~~~
2013 ခုနှစ် စာပေဟောပြောပွဲ
ဘိုးဘွားရိပ်သာ ပေါင်းတည်
~~~~~~~~~~~~~~~~~~~~~~
တန်ဆောင်မုန်းလကုန်ပြီး နတ်တော်လသို့ရောက်လာခဲ့ပြီ နိုင်ငံအနှံ့ မြို့ရွာအသီးသီးတွင် စာဆိုတော်နေ့ ဟောပြောပွဲများကျင်းပကြသည် ။ ကျွန်တော်တို့ ပေါင်းတည်မြို့မှာလည်း စာပေဝါသနာရှင်များ ပေါင်းတည်သားစာရေးဆရာကြီးများကဦးဆောင်ပြီး နှစ်စဉ် သင့်တော်သည့်ရက်တစ်ရက်တွင် စာပေဟောပြောပွဲများလုပ်ခဲ့ကြသည် ။
စာဆိုတော်လ တွင်သာမက ကြားကာလများမှာပင် ပေါင်းတည်သားစာရေးဆရာကြီး ဦးသိန်းလွင်(အင်္ဂလိပ်စာ) ၏ဆက်စပ်ဖိတ်ကြားချက်ဖြင့် အစိုးရအထက်တန်းကျောင်း တွင်သော်လည်းကောင်း ဘိုးဘွားရိပ်သာတွင်သော်လည်းကောင်း နိုင်ငံကျော် စာရေးဆရာကြီးများ လာရောက်ဟောပြောလေ့ရှိသည် ။ ဟောပြောပွဲတိုင်း ပရိတ်သတ်အပြည့်ရှိ၏ ။
ကျွန်တော်တို့မြို့သားတွေ ဘယ်အချိန်ကတည်းက စာဆိုတော်ပွဲများကို အလေးထားကျင်းပခဲ့ကြသလဲဆိုတာ လက်လှမ်းမီသလောက် လေ့လာကြည့်ရာ …
ကျွန်တော်လက်လှမ်းမီသမျှ အစောဆုံးအနေနှင့် တွေ့ရသည်မှာ ဆရာကြီးတက္ကသိုလ်ဘုန်းနိုင်ရေးသားသောဆောင်းပါးတစ်ပုဒ်တွင် ဒုတိယကမ္ဘာစစ်ကြီးပြီးကာစ ၁၉၄၅ ခုနှစ်လောက်ကပင် စာပေဝါသနာကြီးသူ စာရေးဆရာများ စုစည်းမိကြသည် ။ ထိုပုဂ္ဂိုလ်များသည် နောင်အခါ နိုင်ငံကျော်စာရေးဆရာကြီးများဖြစ်လာခဲ့ကြ၏ ။ ထိုစဉ်က မိမိရေးသားထားသော ဝတ္ထု ဆောင်းပါး ကဗျာ များကို ပုံနှိုပ် ခြင်းမပြုလုပ်နိုင်သေးသော်လည်း ဗလာစာအုပ်မှာ လက်ရေးဖြင့်ရေးကာ ကိုယ်ပိုင်ဝတ္ထု မဂ္ဂဇင်းများဖန်တီးခဲ့ကြရသည်ဆို၏ ။ ထိုသူများသည် အများအားဖြင့် စစ်ပြီးစ ပေါင်းတည်မြို့မကျောင်းသားကြီးများဖြစ်ကြ၏ ။ ၁၉၄၅ ခုနှစ်တွင် စာဆိုတော်ပွဲ မလုပ်ဖြစ်ခဲ့ကြသော်လည်း စုစည်းမိခဲ့ကြ၏ ။
၁၉၄၆ ခုနှစ်မှာတော့ မြို့မကျောင်းတွင် စာဆိုတော်ပွဲ စလုပ်နိုင်ခဲ့ကြသည် ။ ပြဇာတ်များ အော်ပရာများ ပါ ထည့်သွင်းတင်ဆက်နိုင်ခဲ့ကြသည်ဆို၏ ။ ဆရာကြီးတက္ကသိုလ်ဘုန်းနိုင်ငယ်စဉ်ကျောင်းသားဘဝ စာဆိုတော်ပွဲတွင် တင်ဆက်ကပြခဲ့သော `စီးကရက်´ ဆိုသည့်ပြဇာတ်ကို ထိုအချိန်က ကျောင်းအုပ်ဆရာကြီးဦးထူးရွှေကပင် ဖွင့်ဟချီးမွမ်းခဲ့ရသည်ဆို၏ ။ ထိုအချိန်တည်းက ပေါင်းတည်သားနိုင်ငံကျော်စာရေးဆရာကြီးများပေါ်ထွန်းနေပြီဟုသိရ၏ ။ စစ်ပြီးခေတ်`သွေးသောက်´ မဂ္ဂဇင်းတွင် ကဗျာဆရာ`ထွန်းနေနွယ်´ဦးထွန်းလွင်၊ ၁၉၄၇ ခုနှစ်တွင်ထွက်ပေါ်လာသော `ရှုမဝ´မဂ္ဂဇင်းတွင် `ဘရန်ဒီတစ်ပုလင်း´ဝတ္ထုမှစကာ ထူးခြားပြောင်မြောက်သော ဟာသ ဝတ္ထုများဖြင့် ဆက်တိုက်ထွက်ပေါ်လာသော `ဆရာကြီးသော်တာဆွေ´ဦးကြင်ဆွေ ၊ `ယုဝတီမာလာသိန်း´ဟုထင်ရှားလာသော ဒေါ်ခင်သိန်း ၊ ဆောင်းပါးများရေးသားသူ`ရွှေတည်လျှောင်´တို့သည် ပေါင်းတည်သား စာရေးဆရာကြီးများ ဖြစ်နေပြီဖြစ်သည်ဟုဆို၏ ။
စုစည်းမှတ်သားရသလောက် ပေါင်းတည်သား စာရေးဆရာများမ ၁။ သော်တာဆွေ
၂။ ရွှေတည်လျှောင်(သို့)ပေါင်းတည်အုန်းမောင် ၃။ ထွဏ်းနေနွယ်
၎။ ယုဝတီမာလာသိန်း
၅။ တက္ကသိုလ်ဘုန်းနိုင်
၆။ ရွှေတည်ရန်နောင်
၇။ ပေါင်းတည်စန်းမြင့်
၈။ ပေါင်းတည်ခင်မောင်အေး
၉။ ပေါင်းတည်ဘုန်းကြည်
၁၀။ ကောက်လှိုင်း
၁၁။ မောင်ကျော်သာ
၁၂။ နန္ဒာသိန်းဇံ
၁၃။ ပေါင်းတည်မင်းသိမ်း
၁၄။ ရွှေတည်ခင်ထွေး
၁၅။ နုသဇင် (သင်းရိပ်သာ)
၁၆။ မောင်သိန်းလွင် (သို့)ဆရာဦးသိန်းလွင်
၁၇။ ပေါင်းတည်နွယ်နွယ်သန်း
၁၈။ မြလှိုင် (တိုင်းရင်းဆေး)
၁၉။ ကျော်ကျော်ငယ်(စာပေဗိမ္မာန်စာမူဆုရ)ဦးအုန်းကျော်
၂၀။ လွမ်း (ပေါင်းတည်)
၂၁။ ကျီးမနိုးတင်ဝင်း
၂၂။ တက္ကသိုလ်မြတ်ခိုင်
၂၃။ ရွှေတည်စံ
၂၄။ မောင်မောင်လှတင် (ဥပဒေ)
၂၅။ မင်းဟေမာန်
၂၆။ မလေးချို (ပေါင်းတည်)
၂၇။ ပေါင်းတည်ခင်သိန်း
၂၈။ သခင်အောင်ကြီး (ပေါင်းတည်)
၂၉။ မင်းဇေယျာထွန်း (ပေါင်းတည်)မြို့မရိပ်သာဆရာတော်
၃၀။ မောင်မင်းဟန်
၃၁။ ခင်မောင်ဇော်
၃၂။ ပန်းနှင်းမွန်မွန် (Dr: Mon Mon Aung)
၃၃။ ဓမ္မနွယ် (ရွှေတည်မြေ)
တို့ဖြစ်ကြပါသည် ။
ယနေ့ခေတ်တွင်လည်း စာပေဟောပြောပွဲများ တိမ်ကောမသွားပဲ ပို၍တောင်စည်ကားသိုက်မြိုက်စွာကျင်းပလာနိုင်ကြသည်မှာ အားရဖွယ် ဂုဏ်ယူဖွယ် ဖြစ်ပေတော့သည်။
No comments:
Post a Comment